Kryetari i Partisë së Lirisë, Ilir Meta u pyet sot në konferencën për mediat lidhur me protestat dhe reagimet e opozitës në vjeshtë.
Pas denoncimit të projektit të Portit të Durrësit, Meta tha se pritet përgjigje nga qeveria për pyetjet e ngritura mbi këtë projekt.
“Duam përgjigje të menjëhershme sipas ligjit për të gjitha pyetjet që ka bërë deputeti Petrit Vasili. Në varësi të reagimeve ne do përshkallëzojmë qëndrimet tona. Ne do dalim në përkrahje të çdo iniciative qytetare se protesta është vetë demokracia. Ky është zgjim i pandalshëm. Ne do bashkëpunojmë me çdo forcë politike opozitare, me çdo grup interesi, me lëvizjet qytetare për të rivendosur llogaridhënien urgjente në këtë vend. Ky është i pandalshëm e këtë më mirë se kushdo e di vetë Rama. Historia ka ndryshuar një herë e përgjithmonë. Këto borxhe do i paguajë ai i pari dhe gjithë shpura e tij. I bëj thirrje gjithë punonjësve në shtet të jenë shumë të kujdesshëm mos përdoren si bedela për të firmosur shkresa e akte të paligjshme se do marrin në qafë veten e familjet e tyre”, u shpreh Meta.
